حوار صحفي | السيناريست أماني التونسي تشارك أسرار نجاحها في مجال السينما والكتابة

صحافة : شمس خالد عبدالعزيز

تحرير : محمود منسي

من نجاحات لأخرى تميزت بها أماني التونسي في أعمالها مؤخراً وحققت نجاح استثنائي سواءً كان في السينما أو التلفزيون، وعشان كده قررنا نعمل حوار جميل واستثنائي عشان نعرف تفاصيل أكثر عن سر نجاحها.. ومن بعض أعمالها الفنية: فيلم “توأم روحي” – فيلم “قصة حب” – فيلم “بين بحرين” – فيلم “مستر إكس مشاركة في حكاية “ويبقى الأثر” وحكاية “على الهامش” من مسلسل “إلا أنا 2” – مسلسل “العيلة دي“.

مجلة انفلونسرز توداي: ايه اللي دفع أماني التونسي الطالبة في كلية الحاسبات والمعلومات لتغيير رحتلها وتوجها لمجال الفن والاعلام؟

أماني التونسي: أنا غيرت المجال بتاعي وإنتقلت للمجال الفني عشان ببساطة أنا بحب الكتابة من وأنا صغيرة وعندي كتب في السوق فكان نفسي طول عمري اني أعمل ده وأكتب أفلام تلهم المشاهدين وتحرك فيهم مشاعر وأفكار مختلفة.

مجلة انفلونسرز توداي: البداية في عالم السينما والكتابة كانت أكيد مليانة تحديات، احكيلنا عن أكتر تحدي صعب مريتي به خلال مسيرتك المهنية؟

أماني التونسي: التحديات اللي قابلتني هي محاولة إنك يعترف بيكي وإثبات اني أكون سيناريست ومؤلفة شاطرة لما يكون عندي الفرصة أعرف أستغلها، وتحدي صعب مريت بيه زي مثلاً تحصل مشكلة في الشغل أو منافسة غير شريفة، بعد ما أتعب في الشغل فالدنيا تبوظ بأي شكل من الأشكال والمشروع ميكملش.

مجلة انفلونسرز توداي: يا ترى في فيلم من أفلامك قصته ليها علاقة مشابهه بحياتك الواقعية؟

أماني التونسي: أها فيلم “قصة حب”. والدي فقد بصره فكانت فترة مش سهلة ووقتها لما كتبته فكان فيه نسختين.. نسخة اتكتبت بشكل مش منتشر يعني والنسخة التانية بعد ما توفى بإسبوع فضلت أكتب فيه زي مشهد النهاية لأن الحاجات دي بتفرق معايا جداً، فهي كانت علاقة عاطفية في الفيلم ولكن في الحقيقة كانت عاطفية من ناحية الأب.

مجلة انفلونسرز توداي: كان ايه شعورك لما تم تكريمك من خلال فاعلية مناهضة العنف ضد المرأة وانك قدمتي محتوى يدافع عن حق المرأة ويبرز مكانتها في المجتمع؟

أماني التونسي: شعوري كان بالفخر لما تم تكريمي وكمان التكريمات اللي من البلد بتحسسني بالتقدير وبتديني تشجيع أكتر اني أكمل.

مجلة انفلونسرز توداي: آخر أعمالك في العرض مسلسل “العيلة دي” ف طبعا رأيي هو مسلسل دراما عائلية وكوميدية وحلو جداً وفي كذا فكرة، ف ايه رأيك ف آراء الناس عن المسلسل وشعورك ايه بنجاحه؟

أماني التونسي: بالنسبة لمسلسل “العيلة دي” أنا سعيدة جداً بالنجاح الحمدلله وأتمنى إنه دايماً ببقى بعمل أعمال بتسيب أثر حتى لو أثر ليه علاقة بإنك تكوني مبتسمة..

وصرحت أماني التونسي بأنه من أول الأعمال الكوميدية لها حيث قالت:

 

_مش بعتبره كوميدي صرف ولكن هو مسلسل لايت كوميدي اجتماعي بيناقش دراما اجتماعية، وسعيدة بردود الأفعال وأنه عجب الناس وسعيدة إن الناس تجاوبت معاه بالشكل ده، يعني هو ناجح بنسبة كبيرة الحمدلله وأتمنى أعمل أعمال أكبر وتنجح أكتر وتكون مُرضية للذوق العام كله.

مجلة انفلونسرز توداي: نصيحة تحبي تقدميها للي بيحبوا الكتابة وعايزين يطوروا من نفسهم ومش عارفين يبدأوا منين سواء لكتابة رواية أو سيناريو؟

أماني التونسي: والله أقول للي يحبوا يطوروا نفسهم في الكتابة انهم (1) يدرسوا كتير وياخدوا كورسات في المكان الصح و(2) يقرأوا كتير و(3) يكتبوا بشكل مستمر و(4) طبعا لا مكان لليأس.

مجلة انفلونسرز توداي: ايه هي القضايا أو القصص اللي تحبي تعرضيها وتقديمها للجمهور الفترات القادمة؟

أماني التونسي: أحب أقدم القصص الروحانية والصوفية بالأخص، بس لسه مجتليش الفرصة اني أقدر أعمل ده، وأحب أقدم القضايا اللي تهم الناس كلها يعني أحب طول الوقت أكون مواكبة العصر مهما اتقدم بيا العمر، وأتكلم بلسانه وأتكلم في حاجة تهم الناس في كل وقت.

مجلة انفلونسرز توداي: أكيد كل كاتب بيجيله فترة إحباط وملل بتخليه يوقف كتابة ويفقد شغفه، ايه اللي بيشجعك ويحفزك ترجعي تكملي كتابة برغم أي صعوبات وإحباطات بتمري بيها؟

أماني التونسي: اللي بيخليني اتحفز تاني إن أنا أكتب أو أعدي الصعوبات هو الناس اللي بحبهم وأعمالي اللي قبل كده، إيماني بربنا إن أنا ليا رسالة لازم أقدمها، ف طبيعي إن الإنسان يمر بصعوبات ولكن المهم إنه يكون مؤمن إنه عنده رسالة لازم يقدمها ويستمر فيها ويشجع نفسه بنجاحاته اللي قبل كده وبوجود الناس اللي بيحبهم وأولاً بإيمانه بربنا إنه يقدر.

مجلة انفلونسرز توداي: كتير دلوقتي من الانفلونسرز بيدخلوا في مجال الفن والتمثيل ف ايه رأي حضرتك في الظاهره دي؟

أماني التونسي: والله لو الانفلونسر ده شاطر والناس بتحبه وله تأثير مختلف عليهم، هينجح وهيكمل معاهم، هو مش أبعد من الموبايل اللي بيقدم من قدامه فأكيد لو عرف يسيب إنطباع “بشكل مستمر” على الجماهير هينجح.

مجلة انفلونسرز توداي: شخصية مؤثرة في حياتك لو هتختاري حد واحد بس هيكون مين؟

أماني التونسي: شخصية مؤثرة في حياتي إني اختار واحد بس دي حاجه مستحيلة جداً، أنا في ناس كتير جداً بتترك أثر فيا من الولادة يعني من الأب للأم للأخوات للتلميذ في الفصل، ولكن ممكن أقول إن أبويا وأمي الله يرحمهم هما أكتر ناس أثروا فيا.

مجلة انفلونسرز توداي: هل التعاون مع الزملاء في التأليف والكتابة بيكون فيه صعوبه في تلاقي الأفكار ولا بتكون ازاي طريقة المشاركة في كتابة السيناريو؟

أماني التونسي: التعاون مع الزملاء في التأليف طبعاً بيبقى صعب جداً، إلى أن تصل لمرحلة إنك تلاقي حد نفس دماغك أو مش هقول نفس طريقة التفكير بس بتكملوا بعض ف أعتقد ده بيبقى حاجة كويسة لما يبقى فيه تكملة.

مجلة انفلونسرز توداي: الحياة عبارة عن تضحيات، بيجي علينا لحظة لازم نختار حاجة ونسيب حاجة والاتنين بيكونوا غالين علينا، يا تري ايه هي التضحية والاختيار اللي اختارتيه وكان صعب عليكي وقتها؟

أماني التونسي: موضوع التحديات ده فيه كذا جانب معرفش ولكن اللي أقدر أقوله إني ممكن أكون بضحي بصحتي، دي حاجة بتبقى مؤلمة جداً إني برهق نفسي في الشغل لعدد ساعات كبيرة وخصوصاً لما بيكون فيه تصوير، فأعتقد دي بتبقي أكبر تضحية، لكن أنا كل الحياة عندي هي الكتابة وشغلي، مضحتش بحاجة قصاد حاجة بس ممكن أكون باجي على صحتي شوية ودي الحاجة اللي أنا نفسي أغيرها إني أعمل لنفسي أسلوب حياة صحي.

مجلة انفلونسرز توداي: نشكرك على فنك اللي دايما هادف ومختلف، واللي دايما متفوقة فيه عن نفسك، وبنتمنى لحضرتك كل التوفيق والإبداع والنجاح المستمر.

:لمتابعة أماني

Leave a Reply

Your email address will not be published. Required fields are marked *