حوار صحفي | مــــحمد سعـــــــدون
مدير مهرجان الأسكندرية للأفلام القصيرة 2023

صحافة: خديجة طارق عمـارة

تحرير: محمود منسي

تنسيق: خلود نصر

مجلة انفلونسرز توداي: حابين في الأول نعرف فكرة المهرجان للأفلام القصيرة جات إزاي؟ يعنى مين كان صاحب الفكرة ومين دعمها ومين اتحمسلها؟

محمد سعدون: فكرة المهرجان بدأت من واقع تجربتنا حيث إننا مخرجين وصناع أفلام كنا بنعاني جدًا إن أفلامنا تدخل منصة زي المهرجان وإن يبقى في إهتمام مخصوص للأفلام القصيرة، لأن الاهتمام الأكبر كان دايمًا على الأفلام الطويلة، وطبعًا دي حاجة مهمة، فالفكرة بدأت من هنا، إننا عايزين نعمل مهرجان يكون كُل تركيزه على الأفلام القصيرة فقط، والريد كاربت يبقى كله مخرجين صناع الأفلام القصيرة.و
في سنة 2014، قعدنا نتكلم أنا ومحمد محمود وموني محمود وشباب كانوا متحمسين جدًا لفكرة المهرجان، وبدأنا بالفعل أول دورة للمهرجان في إبريل 2015 ، ودعمونا المخرجين اللي كانوا واثقين فينا من الدورة الأولى شافوا إننا صناع أفلام عاملين مهرجان فبدأوا يستجيبوا معانا، ودعمتنا المراكز الثقافية في اسكندرية طبعًا.

مجلة انفلونسرز توداي: كل دورة من دورات المهرجان بيبقى فيها تحديّات مختلفة بتواجهوها، ممكن تقولنا إيه التحديّات اللي قابلتكم في الدورة التاسعة من المهرجان؟

مدير المهرجان محمد سعدون: اننا بقينا دورة تانية كـــ (مهرجان دولي)، فكانت تحديات قوية جدًا إن يكون في فعاليات أكتر، زي مثلًا السنة دي قدّمنا ورشة صناعة أفلام بالموبايل للطفل، إزاي الطفل يقدر يصنع فيلم بموبايله ويقدر ينزله على السوشيال ميديا وإزايي يختار زاوية الكاميرا ويمنتج.. بحيث نصنع جيل سينمائي جديد. وقدّمنا برده ورشة الإخراج السينمائي للمخرج خالد الحجر ودي ورشة تكميلية للسنة اللي فاتت. كل دى أفكار بتساعد المهرجان إنه يبقى أقوى، وجمهور الأسكندرية يقدروا يستفادوا أكبر استفادة من المهرجان، ويشوفوا أفلام وثقافات مختلفة يتعلموا منها.

مجلة انفلونسرز توداي: بعد تسع دورات من مهرجان الأسكندرية للأفلام القصيرة، شايف أد إيه فيدتوا صناعة السينما العربية والعالمية؟

مدير المهرجان محمد سعدون: أنا شايف إن المخرجين المشاركين والجمهور هما اللي يجاوبوا على النقطة دى، عشان إحنا وسيط ما بين صناعة الأفلام القصيرة وصناعة السينما والجمهور، والحمدلله إحنا من الدورة الأولى قدرنا إننا يبقى لينا جمهور خاصّ، جمهور عارف إنه جاي المهرجان يشوف سينما مختلفة، وإحنا بنجتهد فى اختيار الأفلام طبعًا بإدارة (موني محمود) المدير الفني. لكن في الآخر رأي الجمهور هو اللي يحدد أد إيه فيدنا صناعة السينما.

مجلة انفلونسرز توداي: إيه أكتر فعالية فخور بيها في المهرجان؟

مدير المهرجان محمد سعدون: كل فعاليات المهرجان فخور بيها، لإننا بنشتغل على الفعاليات دي من سنة كاملة، فكل تفصيلة موجودة في المهرجان أنا مهتم ومبسوط بيها، زي ماستر كلاس (أستاذ أنسي أبو سيف) مهندس الديكور الكبير، وورشة (المخرج محمد ياسين) كانت عظيمة برده

مجلة انفلونسرز توداي: توعد بإيه يكون مختلف في الدورة العاشرة للمهرجان؟

مدير المهرجان محمد سعدون: إحنا بنجتهد دايمًا إن كل دورة يبقى في شيء جديد ومختلف، وإزاي نطور الأفلام وأماكن الفعاليات، وإن شاء الله الدورة العاشرة للمهرجان يكون في فعاليات أكتر وورش أكتر في تخصصّات تانية بحيث الكل يستفاد ويتبسط زي كل دورة.

Leave a Reply

Your email address will not be published. Required fields are marked *