عمرو الزعيم: دوري في الورشة هوالمساعدة بشكل كبير في مراجعة المعلومات الخاصة بجزء التصوير مع المخرج أحمد سمير وفي المونتاج مع المونتيرة أمل مطر ووضع اللمسات الأخيرة للأفلام مع الأطفال، ومراجعة الخطوات مرة تانية وإننا نفكرهم بالمعلومات لأن الورشة بتتم في وقت قليل جدًا بشكل مُكثَّف على مدار أيام قليلة يوميًا فبنحتاج مراجعة المعلومات مع الأطفال مرة تانية.
من الحاجات المميزة جدًا في الورشة هي أدوات تصوير مُقدَّمة من iCam store كهدية للأطفال عبارة عن مايك وحامل للموبايل سهل للأطفال أنهم يستخدموه، ودة جزء تاني بالنسبة لدوري في الورشة وهو إني أعرَّفهم ازاي يستخدموا الأدوات دي وفي رأيي إن دي حاجة مهمة جدًا أن الطفل من وهو صغير يعرف إن فيه أدوات بسيطة ممكن تساعده في التصوير ومش مجرد كاميرا الموبايل بس، بالنسبة للصوت مثلًا، يقدروا يستخدموا المايك الخارجي ويوصلوه بسلك للموبايل على بعد مسافة بدل من استخدام مايك الموبايل لتسجيل الصوت، ودي هتاخدنا لنقطة مهمة جدًا لأن كتير من صناع الأفلام القصيرة وبالذات في مصر مش بيهتموا بالصوت وبيغفلوا عنه بسبب التكلفة في حين أن الإستعانة بمهندس صوت للمكساج وتسجيل الصوت وعمل موسيقى تصويرية خطوة مهمة جدًا لأن الصوت عنصر أساسي لا غنى عنه في صناعة السينما ودة اللي بيخلِّي كتير من الأفلام القصيرة جيدة جدًا على مستوى القصة والفكرة والصورة والإخراج والإنتاج ولكن على مستوى الصوت بيكون ضعيف جدًا وطبعًا دة بيبكون سبب لعدم قبول بعض الأفلام القصيرة في المهرجانات، والدليل على كدة أن حتى الأفلام الصامتة بيتضاف ليها موسيقي تصويرية في الخلفية علشان يوصَّل حالة ما.
أنا شايف أن دي فرصة كويسة جدًا لصانع الفيلم من وهو صغير إنه يعرف أهمية الصوت والإضاءة ومعدات التصوير المساعدة والإكسسوارات وكل العناصر دي ومع التجربة والخطأ في سن صغير هتوفر كتير جدًا على صانع الأفلام في المستقبل وهتساعده أنه يبدأ مجال صناعة الأفلام بمعرفة وخبرة جيدة من صغره.