مجلة انفلونسرز توداي: زي ما فهمنا من الفيلم أن دي قصة حياتك، مش كدة؟
المخرج طارق عبدلله: أه في الفيلم أنا بحكي عن حياتي، عن علاقتي بأمي، عن علاقتي بجدتي أكتر والمكان اللي هي عايشة فيه “القاهرة”، وعلاقتي بالمدينة اللي أنا أتولدت وعشت فيها طول عمري “القناطر الخيرية” وهي بلد أبويا.
مجلة انفلونسرز توداي: في الفيلم ربطت بين توفي والدك وبين الهروب من القناطر الخيرية وال كان أشد ألماً، أية سر الربط ده وقصدك أية بأن هروبه من القناطر بيوجع أكتر من فكرة أنه توفى؟.
المخرج طارق عبدلله: مش بالظبط، بس أنا كنت بقول أنه والدي اتوفى وأنا في سن صغير، فمكنتش واعي بقد أية أو محستش بصعوبة أو تقل اتجاه ده، بس اللي بقيت بحس بيه مؤخراً إن أنا قاعد في بلد أو بالمعني الأصح القناطر في هذا البيت ال أتعرضت صورة في الفيلم وإني مش عارف أهرب من المكان! فيه حاجة ناقصة وأنا مش عارف أتعايش مع عدم وجودها .
مجلة انفلونسرز توداي: تفتكر الفيلم أثر إزاي في المشاهدين؟
المخرج طارق عبدلله: مش عارف، بتمني أنه يكون أثر، معرفش حيأثر ولا لا بس وأنا بفكر أعمل فيلم شئ من الأنانية أني أفكر إزاي حيأثر فيا. أنا كان عندي مشاعر حاسس بثقلها ومش عارف اخرجها أو أعبر عنها فيمكن فيه شئ كدة من الراحة لما عملت الفيلم. وأتمنى طبعاً أنه يأثر في حد.
مجلة انفلونسرز توداي: تصوير الأفلام بيمثل ليك اية؟
المخرج طارق عبدلله: مساحة أقدر أشارك فيها المشاعر اللي عندي والأفكار اللي جوايا. في الفيلم ده بالتحديد كان ده السبب ال بعمل بيه الفيلم، لأن عندي أفكار ومشاعر مش قادر أبوح بيها بأي شكل غير إني أعمل فيلم! عشان كدة بعمل أفلام.
مجلة انفلونسرز توداي: ورا كاميرا الشخص اللي كان بينسق الصور، أوصف لنا شعورك وأحاسيسك وأنت بتجبر نفسك تعيش حاجة ممكن تكون مصدر ألم ليك بس بس عاوز توريها للناس؟
المخرج طارق عبدلله: والله الصراحة الموضوع مكنش بهذه الصعوبة، هو كان العكس كمان. بالنسبة لي عملية صناعة الفيلم كانت عملية استشفائية يعني. الأفلام دي بنعملها عشان نستريح يعني مش نتعب. أكن فيه حاجة مضايقاكي وبتستريحي لما تحكيها لحد من صحابك.. ده مش معناه إنها مبقتش مضايقاكي، بس إنك حكيتي ده ريحك شوية.
مجلة انفلونسرز توداي: نصيحة ممكن تديها للعايز يبدأ في مجال تصوير الأفلام؟
المخرج طارق عبدلله: ممكن أقوله يلا أعمل الحاجة. متخفش لو عايز تعمل فيلم قوم أعمل فيلم حتي لو لسة مش متعلم كتير، ومن خلال التجربة الإنسان بيتعلم.
مجلة انفلونسرز توداي: قولنا حاجة كان نفسك تقولها لنفسك من 10 سنين..
المخرج طارق عبدلله: ممكن أطمنها وأقولها أن الزمن الحلو جاي ودي حاجة بقولها لنفسي لحد دلوقتي.
مجلة انفلونسرز توداي: ممكن توصف لنا المهرجان في كلمة واحدة..
المخرج طارق عبدلله: كلمة واحدة صعب بس مبسوط خالص إننا هنا وفي الأسكندرية كمان بالتحديد، ده أول مكان أدرس فيه سينما وجيت أول ورشة في حياتي هنا.
