مجلة انفلونسرز توداي: حابين نعرف إيه انطباع حضرتك عن فعاليات المهرجان؟
المخرج عمر حجازي: يشرفني إني أكون في مهرجان الأسكندرية للأفلام القصيرة، وأنا حضرت مهرجانات كتير تانية كزائر فقط بس ده أول مهرجان أشارك فيه وأول فيلم ليا، فأنا مبسوط جدًا تجربة جميلة وعمري ما هنساها ومتحمس بالأفلام والفعاليات.
مجلة انفلونسرز توداي: نحب نعرف من وجهة نظرك، شايف الفيلم القصير يقدر يوصل نفس الرسالة اللي بيوصلها الفيلم الطويل؟
المخرج عمر حجازي: طبعًا، بس اللي أعرفه إن الفيلم القصير في مصر مش مدعوم زي الأفلام الطويلة، مع إن في صناع مُبهرين جدًا، وأنا عن نفسي كــــــ (عمر) ممكن أتفرج على فيلم قصير يوصلي إحساس محستهوش من الفيلم الطويل، وده طبعًا بيفرق فيلم عن فيلم. بس أنا يعني من مشجعين الأفلام القصيرة جدًا ونفسي أشتغل طول حياتي أفلام قصيرة بس، أولاً عشان سهلة وسريعة، ثانيًا مبتكلفش كتير زي الفيلم الطويل طبعًا..
مجلة انفلونسرز توداي: بعد عرض فيلمك إنهاردة كان في ردود أفعال إيجابية وعجب ناس كتير، فحابين نعرف فكرة الفيلم جات إزاي؟
المخرج عمر حجازي: في وقتنا الحالى، في شركات إنتاج كتيرة جدًا ومنتجين ومهرجانات بيدّوا فرصة للصناع اللي لسه طالعين إنهم ينتجوا أفلامهم، بس طبعًا ده مش سهل، لأنه بيبقي محتاج سيناريو قوي وإن الفيلم يكون يستحق فعلًا الفرصة دي..
مجلة انفلونسرز توداي: إيه أكتر نوع بتحبه من الأفلام القصيرة؟
المخرج عمر حجازي: الروائي، ومؤخرًا بقيت بحب الأنيميشن.
مجلة انفلونسرز توداي: ألف مبروك مشاركتك بالمهرجان ونجاح الفيلم، وفي انتظار أعمالك الإبداعية الجديدة..
