مجلة انفلونسرز توداي: مع بداية الفاعليات للمهرجان خلال دورته التاسعة ايه رأيك في اجواء المهرجان وايه الفرص اللي بيقدمها المهرجان للشباب؟
د/ رجاء الغمراوي: أنا يمكن المهرجان ده سعيدة بيه جدًا من بين كل المهرجانات من أول ما بدأ عشان الشباب إنه بيقدم فرصة للشباب والاشتراكات للأفلام فالمشاركة معظمها شباب وده مفرحني ومخليني فخورة بيهم جدًا.
مجلة انفلونسرز توداي: ايه رأيك في التطورات اللي وصل ليها المهرجان ووصوله دوليًا ومشاركة الأفلام فيه من بعض الدول المختلفة؟
د/ رجاء الغمراوي: مهرجان الأسكندرية للفيلم القصير دي الدورة التاسعة ليه وهو بيتقدم كل سنة عن اللي قبلها وبدأ ينتشر بشكل أسرع وأفضل بين الشباب وبدأو يشاركوا فيه ودي حاجه كويسة جدًا.
مجلة انفلونسرز توداي: في هذه الفترة تم انطلاق عرض قناة الوثائقية ايه رأي حضرتك ف كونها قناة جديدة وازاي ممكن تقدم تطور جديد ومختلف لمفهوم الفيلم الوثائقي؟.
د/ رجاء الغمراوي: القناة الوثائقية دي هيكون ليها مستقبل كبير جدًا جدًا لأن الوثائقي هو عقل الأمة، وهو اللي بيحافظ علي تراث الأمة، وهو صعب ومُكلف ولذلك محدش كان بيقبل عليه والاشتراك فيه بيكون قليل ولكن الآن مع وجود قناة وثائقية أعتقد إن الأمر هيختلف تمامًا للأفضل .
مجلة انفلونسرز توداي: ازاي ندعم الطلبة اللي في الجامعات العملية واللي بيكون مجالها صناعة الأفلام القصيرة في مشاريع جامعتها وتخرجها من خلال المهرجان أو طرق أخري؟
د/ رجاء الغمراوي: نقدر ندعمهم بتكثيف ورش العمل بشكل أكتر، ويمكن هنا في أفلام كسبت كتير من خلال هذه الورش، وفي كمان المهرجان المصري الأمريكي في فيلم من شباب الطلاب كسب وأخذ مركز أول والطلاب سافروا واستلموا الجائزة في أمريكا، فده نجاح وإنجاز للشباب، والشباب هو المستقبل لو مهتمناش بيه ودعمناه مش هيكون فيه مستقبل.
مجلة انفلونسرز توداي: شكراً للحوار ولطاقة حضرتك الإيجابية ودعمك للشباب.